A Rede Museística Provincial de Lugo aposta pola museoloxía social. Por iso, as propostas dos catro museos pivotan sobre temas que teñen que ver coas persoas. E, dende elas, coa comunidade, o territorio e o patrimonio material -como as coleccións- e inmaterial -como a memoria-.

Aquí atoparás propostas desenvolvidas pola Rede, clasificadas segundo as liñas temáticas que definen a nosa maneira de ser museos e de estar na sociedade.

En 1985 en Portugal nace MINOM: unha innovadora corrente que establece a súa teoría en base a tres conceptos que forman a estrutura do Museo social: comunidade, patrimonio e territorio.

Os programas da Rede Museística siguen esta corrente de pensamento dende o seu nacemento no 2006. En realidade, todos os proxectos da Rede Museística poderían estar incluídos neste apartado, pero aquí atoparás concretamente aquelas accións levadas a cabo dende a RMPL co obxectivo de profundar, aportar, difundir, aprender,… sobre Museoloxía Social.

Na Rede Museística propuxémonos o uso  de diversas ferramentas tecnolóxicas para documentar e visibilizar patrimonio inmaterial vinculándoos ao espazo público, co obxectivo de traballar identidade, memoria e territorio en relación ás catro desigualdades: xénero, clase, etnia e discapacidade.

Con estos proxectos, vinculados ás persoas maiores, pero tamén ás dinámicas interxeracionais, realizamos un achegamento alternativo ao mundo rural e a quen o habita ou habitou con toda a súa diversidade, conectando e poñendo en valor aspectos ás veces invisibilizados, así como a súa riqueza cultural e social. 

Iniciativas que traballan na definición da comunidade a través da recuperación de memoria e da visión e a vivencia das persoas sobre o lugar que habitan.

Propostas pensadas para coñecérmonos sen complexos nin prexuízos e para ocupar o noso lugar no espazo e no relato tradicional.

Nesa vontade de re-formular o discurso activamos SoTERRAdas: un programa no que integramos 23 anos de proxectos  e todo un Plan que pretende dar luz á escuridade e voz ao silencio, de cara visibilizar as desigualdades sufridas, de xénero e tamén de clase. Facémolo precisamente dende o museo, tradicionalmente a institución privilexiada dunha clase determinada: o espazo onde se conservou o coñecemento e a historia “oficial”.

Temos por diante o reto de reformular a institución en clave de diversidade e igualdade. A renovación do pensamento e da práctica museolóxica iniciada por Henry Riviere e André Desvalles, a altermuseoloxía de Pierre Mayard, marcáronnos o camiño: queremos profundar na idea dun museo expandido, aberto, flexíbel, dinámico e accesíbel á expresión humana.

Un novo museo chegou para quedar: un museo traballando e pensando no común, no que as obras, os coñecementos, os obxectos son de todos, todas e todes para xerar un espazo no que ninguén sexa excluído.

Accións que queren afondar na plena inclusión da cidadanía e traballar arredor da integración e a accesibilidade mais aló da rampla ou dos recursos en braille. Proxectos e actividade para dar lugar a diversidade, para que todxs podamos disfrutar dos nosos dereitos e para derribar barreiras físicas e simbólicas.

Propostas de formación, capacitación e actualización coa comunidade para crear. E recursos, ferramentas e experiencias de traballo para reflexionar xuntxs e  construír un museo no que estemos todes!

Iniciativas que posibilitan o coñecemento entre culturas e puntos de encontro e conexión nos que medrar xuntas nun contexto no que a colaboración é imprescindible. Por iso, os verbos cooperar, colaborar, co-coordinar, co-organizar co-producir, co-crear así como co-xestionar están presentes nestas iniciativas.

Trátase de propostas deseñadas  mediante a colaboración transversal entre RMPL e as asociacións de Inmigrantes e Retornados Rioplatenses en Lugo e as entidades socioculturais e institucións locais, estatais e internacionais vencelladas á migración.

Propostas de reflexión, aprendizaxe ou encontro arredor da educación e a mediación sociocultural. A traves delas a RMPL  promove a participación, o dialogo e o intercambio de coñecementos.